ಸೂತ್ರ

ನಾಳೆಯ ಉಳಿಕೆಗಾಗಿ

ಇಂದು ಭಗ್ಗನೆ ಉರಿದು

ಭಗ್ನಗೊಂಡಿತು ಮನವು

ನಾಳೆಯ ನೆಗಡಿಗೆ ಬೆದರಿ

ಇಂದಿನ ಮಳೆಯಲಿ ನೆನೆಯದೆ

ಶುಷ್ಕವಾಯಿತು ಹೃದಯ

ಇಂದು ಮತ್ತೆಂದೂ ಬರದು

ಬಂದ ಅನುಭವ ಉಂಡು

ತೇಗುವುದಷ್ಟೇ ಸಿರಿತನ

ನೆನ್ನೆಯನು ಕುಕ್ಕಿಸದೆ

ನಾಳೆಯನು ಲೆಕ್ಕಿಸದೆ

ಇಂದು ಉಕ್ಕಿದುದೆ ಗೆಳೆತನ

ನೆನ್ನೆಯ ಉತ್ತರ ಕಂಡು

ನಾಳೆಯ ಪ್ರಶ್ನೆಗಳಿಗೆ

ಸೂತ್ರ ಕಟ್ಟಿದ್ದು ಇಂದು

ನೆನ್ನೆ ಕಳೆದ ಸಿಂಧು

ನಾಳೆ ಆಶಿಸುವ ಬಿಂದು

ಎರಡರ ಸಂಧಿ ಇಂದು

ಭೂತಗಳಿಗೆ ಹೆದರದೆ

ಭವಿಷ್ಯತ್ತಿನಲ್ಲಿ ಕಳೆಯದೆ

ಇಂದು ಆನಂದದಿ ತೇಲಲಿ

ನೆನ್ನೆಯ ಮಧುರ ನೆನಪು

ನಾಳೆಯಭ್ಯುದಯದ ಕನಸು

ಇಂದಿನ ದಿನವನು ರೂಪಿಸಲಿ.

...ಪ್ರವೀಣ.